CCLX.

1368, Januar 3. Frankenstein.

Schiedsspruch in einem Zehntstreite zwischen dem Stifte und dem Scholzen zu Frankenberg.

In nomine domini amen. Quoniam omnis dubietas in re gesta longius propulsari videtur, cum id, quod in mundanis actibus geritur, litterarum et testium ministerio solidius commendatur; proinde nos Johannes Suering dictus de Bebirstein, heres ville Stolcz, Arnoldus de Petirswalde iudex curie Frankensteinensis, nec non Nicolaus Scriptoris, Johannes Carnifex, Heyno Tilonis et Johannes Tamburg dicti, consules civitatis ibidem in Frankenstein, omnes insolidum arbitri speciales electi ad causam subscriptam, tenore litterarum presentium publice notumfacimus universis, quibus opportunum nosse fuerit, quod exortam litem de solutione decime debende monasterio Camencz Wratislaviensis diocesis ordinis Cisterciensis de bonis scultecie in Frankenberg inter ipsum monasterium Camencz ex una, et Thomam scultetum ibidem in Frankenberg parte ex altera, ad supplicationis instantiam religiosi viri, domini Nicolai de Paczcovia prioris eiusdem monasterii Camencensis et ipsius Thome sculteti de Frankenberg, habito respectu ad diffinitionem pro parte ipsius decime quondam factam et in scriptis representatam et prout nos ipsi ex cognitione veritatis lympidius potuimus elicere, sicut subscribitur, amico fine perpetue duraturo duximus terminanter complanandam; videlicet, quod dictus Thomas scultetus in Frankenberg et omnes et singuli sui successores, sculteti ibidem in Frankenberg, de triginta duabus virgis agrorum ad suam sculteciam pertinentibus annis singulis ad hoc statuto ab olim tempore ipsi monasterio Camencz nomine decime sedecim grossos currentis monete dare et solvere dumtaxat fideliter debeant, licet de ipsis iuxta numerum aliorum mansorum ibidem situatorum plenam decimam, utpote sedecim scotos grossorum eiusdem monete currentis annuatim solvere tenerentur. Presertim cum in diffinitione tante concordie ipsi Thome sculteto de Frankenberg et suis posteris ibidem scultetis in solutione decime de dictis suis bonis tanta fierit gratia, sane duximus decernendum, quod ipse et omnes et singuli sui successores ibidem in Frankenberg sculteti in tante relevationis et gratie signum de bonis rusticalibus ibidem in Frankenberg iuxta numerum mansorum ipsam decimam annuatim certo consueto suo termino et tempore colligere debebunt et ipsam ipsi monasterio Camencz fideliter presentare, alioquin ad solutionem plenariam ipsius decime, ut predicitur, de iamdictis suis bonis ipsi monasterio Camencz debende, quando et quotiens oportunum fuerit, simpliciter sine omni reloquio astringentur; presentium sub appensis nostris sigillis testimonio litterarum. Actum et datum Frankenstein per manus Henrici civitatis Frankensteinensis notarii feria secunda proxima post Circumcisionem domini anno eiusdem M°. CCC°. LXVIII°.

Or. Perg. An Pergamentstreifen die SS, des Joh. Suring von Biberstein und des Arnold von Peterswald (s. Pfotenhauer Siegel B. 17. IX. 88.). Ein drittes Siegel fehlt jetzt.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.